context da la pagina
Accent tematic «discriminaziun multipla»
Discriminaziun munta la violaziun da la dignitad umana e dischavantagescha concretamain umans. Co pon ins render visibel e cumbatter cas da discriminaziun che crodan tras ils mecanissem da protecziun dal dretg? E co po in access pluridimensiunal contribuir a l’ulteriur svilup dals dretgs umans? L’accent tematic «discriminaziun multipla» s’occupa cun questas dumondas per cumbatter discriminaziun structurala.
Discriminaziun multipla. Tge è quai?
Ina discriminaziun è in tractament inegual da persunas che sa chattan en situaziuns cumparegliablas. Discriminaziuns èn colliadas cun caracteristicas specificas da gruppas, mainan ad ina degradaziun d’ina persuna e pon chaschunar dischavantatgs materials.
Da discriminaziun multipla u da discriminaziun pluridimensiunala discurrin nus, sche pliras caracteristicas persunalas daventan il motiv da discriminaziun, per exempel tar ina cumbinaziun da las caracteristicas colur da la pel, schlattaina, origin, furma da viver, religiun, lingua, status socioeconomic, stadi da sanadad, nivel da scolaziun euv.
Discriminaziun multipla e discriminaziun intersecziunala
Ina persuna cun impediments, dependenta d’ina sutga cun rodas, vegn discriminada sch’ella entaupa differentas barrieras fisicas en ses mintgadi. Sche quella persuna è ina dunna ed è s’annunziada per ina plazza da lavur, na survegn ella forsa betg quella plazza perquai che la persuna che dat la lavur è da l’opiniun che dunnas na sajan betg adattadas per la posiziun da cader. Questa persuna è discriminada da maniera multipla: en ina situaziun sco uman cun impediments ed en in’autra sco dunna.
En in’ulteriura situaziun vegn ella discriminada al medem temp sco dunna e sco uman cun impediments: Ina persuna che dat lavur na vuless betg mo engaschar nagina dunna, ma era nagina persuna ch’è dependenta d’ina sutga cun rodas. Las discriminaziuns multiplas han lieu uschia u da maniera temporalmain spustada u ellas pon s’accumular e sa rinforzar en ina situaziun.
La medema persuna po era subir ina discriminaziun intersectoriala: Dunnas cun impediments pateschan dapli violenza co per exempel persunas masculinas cun impediments u persuna femininas senza impediments. Las caracteristicas da la persunalitad coincideschan da maniera ch’ellas chaschunan ina furma specifica da discriminaziun.
In tema per la ISDU
En ina chapientscha classica dals dretgs umans vegn discriminaziun pensada da maniera unidimensiunala. Quai cumpiglia il privel che discriminaziuns multiplas vegnan rendida invisiblas e che na pon uschia betg vegnir cumbattidas da maniera effizienta.
Cun quai che las cumbinaziuns da caracteristicas da discriminaziun pon chaschunar ina vulnerabladad speziala da persunas u gruppas, vegnan discriminaziuns multiplas resguardadas adina dapli da la societad civila, dad autoritads e da cunvegnas internaziunalas per ils dretgs umans. Per sustegnair quest svilup e d’al promover vinavant, metta la ISDU ses accent sin discriminaziuns multiplas.
Encunter tut las furmas da discriminaziun
Il concept da la discriminaziun multipla permetta da chapir discriminaziun sco problem structural, da menziunar structuras da pussanza e d’inegualitad en la societad da la Svizra e dad agir encunter tut las furmas da discriminaziun.
En quest accent tematic illuminescha la ISDU la relevanza d’ina chapientscha pluridimensiunala da discriminaziun, per render visiblas discriminaziuns multiplas. L’access pulridimensiunal duai contribuir a l’ulteriur svilup dals dretgs umans, rinforzar la conscienza sociala per la colliaziun da differentas furmas da discriminaziun e manar ad impuls concrets per la politica, giustia e la societad.
